Davao City – Gina proseso na sumala pa karon sa City Government of Davao ang relocation site sa mga nanimuyo daplin sa dagat nga apektado sa Monsoon waves.
Sa interbyu sa DXDC RMN Davao kang Alfredo Baluran, Officer in Charge (OIC) sa Davao City Disaster Risk Reduction Management Office (CDRRMO), gibutyag niini nga aduna nay plano nga relokasyon ang syudad alang sa mga biktima apan padayon pang ginapangita ang eksaktong lugar nga ilang kabalhinan.
“Naa nay plano ang city para anang mga tao diha nga naapektuhan kay naigo man pud gud na sila sa coastal road. On the process pa, nagapangita pa og mga relocation area nga pwede nato sila ipamutang,” saysay ni Baluran.
Samtang gikanayon ni Baluran nga ilang gitambag sa nahisgutan nga dili mubalik sa area labi na nga taas taas pa nga panahon nga masinatian ang dagkong pagbalod sa kadagatan.
“Gi-recommend namo nga kung pwede, especially karon dili nalang usa sila pabalikon kay kining Monsoon waves man gud taas nga panahon ni siya. Muabot ni siya og September, October,” saysay ni Baluran.
RadyoMaN Kirby Manzon
