Davao City – Naaresto atol sa hiniusang pwersa sa mga awtoridad dinhi sa dakbayan sa Davao ang suspek nga gitudlong nipatay sa mag-uuma didto sa Danao City, Cebu.
Atol sa press briefing gibutyag ni Police Regional Office XI Regional Director Police Brigadier General Marcelo Morales nga nasikop ang suspek nga si Jonas Bueno pinasikad sa arrest warrant sa kasong murder nga gipagula ni Danao City Regional Trial Court Branch 25 Judge Jerry Dicdican.
Segun ni Morales nga si Bueno maoy gitudlong nipatay sa 62 anyos nga mag-uuma nga si Trinidad Batucan kinsa gipanitan usab ang dagway ug napalgang patay sa Danao City, Cebu niadtong Enero 11, 2019.
Segun sa report sa mga awtoridad si Bueno maoy nahibilin sa Bueno Brothers nga mga suspek sa Batucan murder, ang mga igsuon niining sila Junrey ug Juvy napatay sa operasyon sa mga awtoridad niadtong Enero 13, 2019.
Atol joint-operation sa National Bureau of Investigation XI, Mindanao Area Police Intelligence Office, Regional Intelligence Unit XI ug Talomo PNP, Davao City Police Office nadakpan ang suspek didto sa Purok Guadalupe,Barangay Matina Crossing Davao City, alas-5:00 sa hapon subay sa gipadangat nga impormasyon sa nagpakabanang mga sibilyan.
Nag-trabaho ang suspek isip usa ka construction worker samtang nagtago dinhi sa lungsod.
Gibutyag ni Morales nga wala silay narekober nga armas o eksplosibo sa posisyon sa naarestong suspek.
Gilantaw usab sa mga awtoridad ang koneksyon sa Batucan murder ug sa kaso sa 16 anyos kinsa napalgan usab nga patay, gipanitan ug missing usab ang pipila ka mga parte sa lawas niini sa bakanteng lote sa Barangay Bankal, Lapu-Lapu City, Cebu.
“Ini-establish talaga namin if the same person iyon and we have reasons to believe nga siya nga ‘yun kaya’t kamiy naniniwala na siya ang primary suspek doon sa sa dalawang cases na nangyari recently doon sa mga victims nila sa Cebu,” matud ni Morales.
Nigamit og alyas nga ‘Jason Martil’ ang suspetsado.
“Maaring dito sila nagtago mayroon silang kamag-anak dito kaya iyon ang naisip nila na reason na puntahan at kukupkupin sila nga mga kamag-anak nila sa Davao City,” segun ni Morales.
Sumala ni Morales giangkon sa suspek ang pagpatay sa mag-uuma sa Danao apan dili sa 16 anyos nga si Christine Lee Silawan sa Lapu-lapu.
Walay nakuhang armas o eksplosibo ang mga awtoridad sa naarestong suspek.
Samtang, gi-hold sa pagkakaron ang kapuyo niini para sa mga himuong interogasyon.
Magpatuman og hugot nga seguridad sa selda sa NBI XI diin napriso karon si Bueno.
RadyoMaN Aimee Guinita
