Ceiling fan nga nag-overheat niugdaw sa 9 ka mga balay

Davao City – Tungod sa nag-overheat nga ceiling fan naugdaw ang siyam ka mga panimalay sa Purok 8, Teacher’s Village, Daliao Toril ning dakbayan sa Davao pasado alas 7 sa buntag karong adlawa.

Sumala ni Davao City Fire District SFO2 Ramil Gillado ilang naidentipka nga sa kisami nagsugod ang kalayo sa ikaduhang andana sa balay nga gipanag-iyahan ni Bonifacio Tambara.

Sa interbyu usab sa mga imbestigador sa usa sa mga saksi nga si Jessa Torres kinsa live-in partner sa anak sa tag-iya sa balay nga ang giingong ceiling fan baratuhon lamang.


Daling mikuyanap ang kalayo sa mga tapad nga mga balay nga ginama usab sa light materials.

Sumala ni Gillado mokantidad ngadto sa P60,000 ang damyos sa sunog.

Samtang, nakahiagom og minor injury ang usa ka 19 anyos nga babae atol sa insidente.

RadyoMaN Aimee Guinita

Facebook Comments