Davao City – Dakung uyon si Barangay Captain Ariel Lagmay sa Barangay 8-A Poblacion District nga sirad-an ug dili una ablihan sa publiko ang mga pribado ug publikong sementeryo sa dakbayan atol sa Todos Los Santos gumikan lagi sa COVID-19 pandemic.
Matud ni Lagmay, kon unsa man ugaling ang mamahimong hukom sa lokal nga kagamhanan ilabi na sa ideya nga cemetery shutdown sama sa gihimo sa Manila ug Cebu, andam ug tagana sila sa barangay nga motuman unya niini.
Sumala ni Lagmay, usaka maalamon nga lakang kung wala una’y himoong tugtang makasulod sa mga sementeryo karong tuiga sa katarongan nga lisod ma-kontrolar ang virus infection ilabi na kung dili consistent ang katawhan diha sa ciento por cientong pagtuman sa mga obligatory health and safety protocols.
“Kung sa akoa lang, kung unsay gusto ni Mayor Inday nga implimentasyon (sa)… Kalag-Kalag, magsunod gyod ko kaniya kay usa pod siguro (nga kabalaka), mawala na ang social distancing kung magtapok ang mga tawo (sa mga sementeryo) tungod naa pa gyu’y mga kasong nag-abot abot karon…Para ra man na (cemetery shutdown) sa kaayohan sa katawhan,” panapos ni Lagmay.
RadyoMaN Joel Viray
