Malaybalay City, Bukidnon – Nadakpan sa National Bureau of Investigation (NBI)-Malaybalay City Sattelite Office ang nanag-iya ug kooperatiba nga nangolekta ug libuan nga salapi gikan sa gatusan ka mga miyembro niini nga matud pa nailad sa probinsya sa Bukidnon.
Kini human gisilbi sa mga gingsakpan sa NBI ang warrant of arrest nga gi-isyu ni Judge Nelson Salcedo sa Municipal Trial Court sa Valencia City batok sa akusado nga si Marilyn De Lima nga nagpuyo sa Quezon City gumikan sa kasong estafa sa dakbayan sa Valencia.
Sa press conference kagahapon, gibutyag ni Atty. Sally Hans Barbaso ang Regional Director sa NBI Region 10 nga nasikop si De Lima didto sa Laguidingan Airport, Misamis Oriental.
Gi-ingong nakumbinsi ni De Lima ang mga miyembro gumikan gipanag-iyahan matud pa niini ang 4ICD Maharlika Neighborhood Multi-Purpose Cooperative nga naghatag ug housing projects ug scholarships.
Nag-ugat ang pagkasikop kang De Lima gumikan sa reklamo sa usa ka Evelyn Custodio nga taga-Valencia City nga unang naka-invest ug dakong kantidad sa salapi.
Matud ni Atty. Barbaso nga gipatoo matud pa sa suspek ang mga miyembro nga rehistrado kini sa Cooperative Development Authority kon CDA ug Housing and Land use Regulatory Board kon HLURB apan sa ilang pagsuta sa maong buhatan didto sa Cagayan de Oro City dili kini rehistrado.
Una nang mi-atubang si De Lima sa mao nga press conference ug gipamugos nga lehitimo ang iyang kooperitiba.
