Davao City – Andam ang Presidential Commission for the Urban Poor (PCUP) nga maghikutar sa silot batok sa mga establisimento nga wala musunod sa abiso sa gobyerno nga paubsan ang presyo sa ilang mga produkto sama sa mga medisina nga ginabaligya sa mga botika sa tibuok nasud.
Gipangatarungan ni PCUP Commissioner Norman Baloro nga langkob sa ilang trabaho ang pagmonitor sa sa presyo sa mga produkto ug apil na niini ang tahas sa pagrekomendar sa silot sa mga establisimiento nga may kapakyasan sa pagsanong sa mando sa kagamhanan nga baratuhon ang ilang mga baligya sama sa tambal.
Kini aron masiguro nga ang tanang Pilipino partikular ang mga kabus maka-afford gayod og palit sa tambal nga gikinahanglan sa ilang mga kabanay nga dunay balatian ug uban pang mga basic ug prime commodities, matud ni Baloro.
Nakigpulong na usab si Baloro sa uban pang mga ahensiya nga dunay hurisdiksiyon sa presyo sama sa DTI, DOH, ug uban pa kini alang sa joint monitoring operation nga pagahimoon sa mga tindihan ug mga establisiminto sa tibuok Pilipinas.
Busa gidapit sa maong opisyal ang katawhang Pilipino hilabi na ang mga pobre nga makig-alayon sa ilang buhatan aron mapaabot ang ilang reklamo batok sa mga negosyante nga wala nagpatuman og barato nga mga produkto sama sa tambal sa cancer, TB, ug daghan pang uban.
RadyoMaN Joel Viray
