Padayon nga ginabulong sa Western Visayas Medical Center ang checker sang AMLC Builders matapos ginlabu sa ulo sang iya helper gamit ang wasay sini lamang nga gab-i (Abril 11)
Ginkilala ang biktima nga si Sulpicio Sedullo, 33 anyos sang Cuartero, Capiz samtang ang suspek ginkilala kay Guillermo Galendo, 45 anyos sang Barangay Atabay, Janiuay, Iloilo.
Ginpapahayag nga magkaupod nga naga-inum-inum ang duha kon sa diin nagluntad ang indi pag-intsindihanay kag naghangkatanay ang mga ini nga magtapungulay.
Subong man, imbes nga inumol, wasay ang nagtupa sa ulo sang checker nga si Sedullo kabangdanan nakaagum ini sang pilas sa natuo nga bahin sang iya ulo.
Natabu ang insidente sa Construction site sang AMLC Builders sa Hibao-an, Mandurriao.
Madasig naman nga nagpalagyo ang suspek samtang gilayon man nga gindala sa ospital ang biktima.
Nahibaluan nga may daan na nga hiligut-anon sanday Sedullo kag Galendo.
