*iFM – *Dinayaw ni Dr. Roger Braceros, chief of hospital ti Gov. Roque Ablan Sr. Mem. Hospital ti plano ni governor-elect Senior Sanguniang Panlalawigan Member Matthew Marcos Manotoc nga iyun-unana a kitaen ti pakaseknan dagiti hospital ti gobierno apaman a makapagtugaw a gobernador ti probinsia.
Makita ti bokal dagiti perdisyun ken kasta pay ti kinakurang iti ramramit ti ospital ti probinsia. Kalikagomna pay ti mangipaay ti adu a supply ti agas tapnu saanen nga umadayu dagiti pasiente a gumatang ti agas.
Imbatad ni Braceros a nakapinpintas daytoy a napanunutan ti sumaruno a gobernador ti probinsia gapu ta dakkel ti maitulongna iti ad-adda pay a pannakapasayaat ti serbisio ti salun-at para kadagiti kaprobinsiaan.
Immun-una ngem iti daytoy, inbunannag ni Manotoc a kalikagumna a mapasayaat dagiti pasilidad ken kagamitan kadagiti hospital ti gobierno ditoy Ilocos Norte
Kuna ni Braceros a daytoy ti mangipasigurado a maitultuloy dagiti napipintas a programa para iti salun-at a rinugian ni Gob. Imee Marcos nga impatungpal.
Innayonna a saan a masdaaw iti nasao a kalikagum ni Manotoc gapu ta bayat ti panagserbina a senior board member ket binisitana aminen a hospital ti gobierno ditoy probinsia.
Bernard Ver, RMN News
