CHIEF OF POLICE NAN PLACER, SURIGAO DEL NORTE TAGPANHIMAKAK AN MGA ISYU NA TAGPUKO BATOK SA KAPULISAN

504

CHIEF OF POLICE NAN PLACER, SURIGAO DEL NORTE TAGPANHIMAKAK AN MGA ISYU NA TAGPUKO BATOK SA KAPULISAN
Hugtanong tagpanhimakak ni Police Chief Inspector Manolito Parazo an mga isyu na tagpuko batok sa ila mga kapulisan pinaagi ni Ka Oto, an Spokesman nan New People’s Army (NPA) sa Northeastern Mindanao partikular sa mga alegasyon na may kalambigitan sa illegal na droga, kotong ug Extra Judicial Killings an mga kapulisan sa Placer ugsa na nohimo sila sa pagdagit sa duha ka pulis na nakilay-an na sila ni P02 John Paul Mondaya Doverte ug P02 Alfredo Lauro Degamon Jr.
Sumaya pa ni Parazo, posible na sajop na impormasyon an napaabot sa NPA. Tagpanhingusgan na dili tinuod na may mga protector na pulis sa Placer Municipal Police Station ugani sa rekord nila, moabot sa kapin kon kuyang 40 na an ila nadakpan sa mga tagtuohang pushers ug puros nasang-atan ini nan kaso sa korte. Sila matud pa sa tibook Surigao del Norte an may pinakadaghan na nadakpan sa kampanya batok illegal na droga.
Sa isyu sa Extra Judicial Killings, wayay kalabutan niini an kapulisan ugani adton napatay an isa ka Genesis Lebaste adton 2016, an mga ginikanan mismo an noangkon na ini nagbaligya sa illegal na droga, dugang pa wayay ila kalambigitan sa pagkamatay niini ug dili isab angay na ipasangil ini ngadto sa kapulisan sa Placer.
Sa laing isyu pa na nangutong sila sa mga mangingisda o Liba-Liba Operators sanan mga Small Scale Miners, wayay basehan.Dugang pa niini, angay na pangutan-on na lamang an mga hingtungdan, kon nangajo ba sija o an ila mga gingsakupan. Tag-imbitar pa ni Chief Inspector Parazo an mga sakop sa Media ug si bisan sin-o para sa pagpahigayon nan imbestigasyon ngadto sa ila lungsod gumikan kay an mga pasangil an wayay katinuoran.

Facebook Comments