Davao City – Doble ang pagpaningkamot sa Davao City Police Office (DCPO) aron mas muubos pa ang mga kaso sa pagpangabuso sa mga kabataan dinhi sa dakbayan.
Gibutyag ni DCPO Women and Children Protection Desk (WCPD) head P/Sr. Insp. Lilibeth Remolar atol sa interyu sa RMN Davao nga nikunhod og 54.4% ang kaso sa pagpangabuso sa mga kabataan o Violence Against Chilren.
Base sa datos sa DCPO-WCPD, niadtong Enero-Oktobre 2017 adunay natalang 1,262 kaso sa pagpangabuso sa mga bata samtang sa sumasamang period karong tuiga adunay 575 na lamang ka mga kaso.
Usa sa mga padayong ginatutukan sa mga awtoridad ang pagpangabusong sekswal.
Gibutyag ni Remolar nga adunay pagbaba sa mga kaso sa rape diin 183 niadtong 2017 samtang 121 ka mga insidente ang ilang narekord karong 2018 diin ang pinakabata nga biktima nag-edad og 3 anyos.
Sumala ni Remolar napasakaan na nila og mga kaso ang mga suspek ug 3 nalang niini ang wala pa nakiha kay nagpadayon pa ang imbestigasyon.
Gi-awhag ni Remolar ang tanang mga biktima o mga adunay impormasyon nga dili mahadlok nga musumbong kay andam ang kapulisan nga muprotekta kanila ug silotan ang mga dautang tawo.
Subay niini atol sa ika-26th nga kasaulugan sa Children’s month nga nakatutok sa positibong parenting sa temang: “Isulong: Tamang pag-aaruga sa lahat ng bata”, nagpabiling aktibo ang DCPO sa ilang mga programa para sa mga bata nga mao ang Kinder Cops, Sagop Kabataan, Oplan Kalinaw, mga aktibidad alang sa mga DCPO scholars ug daghan pa.
RadyoMaN Aimee Guinita
