Nagpadayon ang selebrasyon sa National Children’s Month dinhi sa dakbayan sa Butuan pinasikad sa gihan-ay nga programa sulod sa tibook buwan sa Nobyembre nga kasaulogan.
Sigun ni Jocelyn Lokite, social welfare assistant 1 sa CSWD nga gipangulohan ni Mayor Ronnievic Lagnada ang aktibidad isip chairman sa Butuan City Council for the Welfare of Children pinaagi sa kick off ceremony sa nakalabyang adlaw’ng Lunes.
Gipahigayon usab ang motorkada palibot sa dakbayan sa Butuan ug gisalmotan sa mga kabataan gikan sa Day-Care Program, Home for the Boys, Lingap Center ug mga Persons with Disability nga mga kabataan.
Tipik sa programa mao ang pagpili ug Most Child Friendly Barangay diin natapos na ang gihimung validation ug napili na ang top 10 sa category A ug category B kansang pagpatuman ug aktibidad alang sa kalamboan sa kabataan nakita nga maayu.
Mismo si Mayor Lagnada maoy mo-anunsyo sa top 3 most child friendly barangay atol unya sa ipahigayon State of the Childrens Report karong buwan sa Disyembre.
Nakita sa national level ang paningkamot sa dakbayan sa Butuan diha sa pagpalambo sa mga kabataan ning syudad pinaagi sa paggahin ug dakung pundo niini mao’ng nakuha sa LGU ang pasidungog isip Child Friendly City sa tibook nasud Pilipinas.
[image: childrens month.jpg]
