Davao City – Malipayong gi-anunsyo karon sa Davao City Health Office (CHO) nga niabot na sa 102.65% ang mga batang nabakunahan sa ikaduhang hugna sa massive polio vaccination.
Atol sa iSpeak Forum, gibutyag ni CHO Technical Division Chief Dr. Julinda Acosta nga sa 186,864 ka mga bata sa Davao City, nilapas na sa 191,807 ang nabakunahan.
Matud ni Acosta, lakip na dinhi ang mga bata nga nagasulod sa Davao pinaagi sa pagdeploy og health personnel sa checkpoints, terminals ug malls.
Gitataw ni Acosta nga dakung tabang usab ang ilang gilusad nga stakeholders meeting uban ang private sector, barangay officials, schools ingon man public ug private hospitals.
Hinoon, wala nagkumpyansa ang CHO diin bisan pa man kon hapit nang makab-ot niini ang 110% vaccination coverage, nagahimo gihapon sila og mapping ug sweeping operations aron maseguro nga walay bata nga dili mabakunahan.
Kahinumdoman nga nakakab-ot og 99.45% immunization coverage ang Davao sa unang ‘Sabayang Patak Kontra Polio’ niadtong October samtang matapos ang ikaduhang hugna karong December 7.
RadyoMaN Jason Amisola
