Matud ni CHO Head Dra.Marjorie Culas nga gikatakda matapos karong Mayo 31, 2023 ang maong programa maong walay hunong ang mga personahe sa City Health Office sa pagbakuna sa mga kabataan nga nag-edad og 9 hangtud 59 ka buwan kon lima ka tuig pa-ubos.
Nasayran nga ang “Chikiting Ligtas sa Tipdas” usa ka tinuig ug nasudnong programa nga nagtumong sa pagbakuna sa mga kabataan aron nga maprotektahan sila batok tipdas, rebulla, ug polio nga balatian.
Segun ni Dr. Culas, usa ka simultaneous ang maong programa diin gikober niini ang tanang mga barangay sa dakbayan.
Una nang gipasabot niini nga puwede musangko sa kumplikasyon ug ang mas piligro maghatud pa sa kamatayon sa usa ka bata nga dili bakunado batok sa nasampit nga mga balatian.
Karong tuiga, target sa CHO nga makabakuna og usa ka gatos ka libo ka kabataan diin karong tuiga nagpabiling pang zero case sa mortality ang siyudad gikan sa maong sakit.
Hinoon sa karon, dili pa makahatag ang maong buhatan sa panglawas og datos kon unsa nang kadaghan sa mga kabataan ang naturokan na kontra tipdas sanglit giingon sa opisyal nga nagpadayon pa ang konsolidasyon sa tanang mga barangay naadtoan na sa team sa CHO ug kon pila na pod usab ka mga bata ang nakadawat na sa bakuna kontra tipdas.
RadyoMaN Joel Viray
