Davao City – Gidasig karon sa Davao City Health Office (CHO) ang publiko nga dili mabalaka ni mag-panic sa coronavirus disease 2019 kun COVID-19 crisis hinungdan nga ang Davao City gipailawom sa Enhanced Community Quarantine (ECQ) sugod niadtong Sabado sa gabii sa miaging semana.
Gi-awhag ni CHO Chief Dr. Josephine Villafuerte ang tanan nga dumalahon og maayo ang kaugalingon aron mabatukan ang stress hatud sa krisis mugna sa COVID-19 nga karon mikuyanap na sa tibuok kalibutan.
Aron malikayan ang COVID-19 stress, gitambagan ni Villafuerte ang matag indibidwal nga maghunahuna og mga buhaton sama sa pag-areglo sa balay, handycraft, gardening ug ubang magpa-busy sa kaugalingon.
Giingon ni Villafuerte nga may dakung epekto sa mga tawo ang COVID-19 hilabi na nga karon nga magpundo lamang sa panimalay ug aron malikay sa stress, importanteng ma-busy sa bisan unsang mga gimbuhaton.
Dili angay magpanuko ang katawhan sa pakig-alayon sa COVID-19 Task Force kung adunay mga simptomas aron mapunggan ang pagkuyanap sa maong virus ug nga mahuman na ang ECQ nga gipatuman denhe sa Davao City.
Dugang tambag sa maong opisyal ngadto sa mga ginikanan nga ipasabot og maayo sa mga kabataan ang katuyuan sa curfew maingon man ang consequences sa mga musupak sa ECQ.
RadyoMaN Joel Viray
