Davao City – Gisiguro sa City Health Office (CHO) nga adunay igong suplay sa medisina alang sa mga biktima sa balatian nga dengue.
Sa interbyu sa DXDC RMN Davao kang CHO head, Dr. Josephine Villafuerte, gikumpirma niini nga adunay igong tambal alang sa mga pasyente apan angay usab nga tutukan ang mga balay tambalanan asa pwedeng ma-admit ang mga pasyente nga positibo sa maong balatian.
“Naa tay enough NS1. Naa tay enough chemicals. Ang atoa lang is ang hospital kung butang ta naay referral, enough ba ang beds nato para admission?” saysay ni Villafuerte.
Gibutyag ni Villafuerte nga nagkataas gayud ang kaso sa dengue sa tibuok nasud diin kini ang nag-unang rason sa pagdeklara sa Department of Health (DoH) og National Dengue Alert.
Saysay sa CHO head nga pinaagi niini mas mapakusgan pa ang kampanya batok dengue pinaagi sa mga aktibidad sama sa kanunay nga pagpanglimpyo ug pagtuman sa “4 o’clock habit”.
“Panawagan nato nga kinahanglan, kabalo man ta nga nagasaka ang case sa atong dengue kita pud mag-amping sa atong kaugalingon, maglimpyo sa atong palibot,” tataw ni Villafuerte.
RadyoMaN Kirby Manzon
