Davao City- Nanawagan ang City Health Office (CHO) sa katawhan nga dili usa magpahigayon og parties o mga pagtapok-tapok nga gikabalak-ang mahimong rason sa pagdaghan pa sa mga kaso sa coronavirus disease 2019 (COVID-19) subay sa pagsaulog sa kapaskuhan ug bag-ong tuig.
Gibutyag ni Dr. Ashley Lopez, DOH Davao City Health COVID-19 focal person nga laumang adunay ipagulang executive order si Davao City Mayor Sara Duterte sa pagdili sa mga ‘superspreader events’ sa pagpugong sa pagdaghan pa’g samot sa ihap sa mga kaso.
Matud ni Lopez nga gikansela na ang mga Christmas celebration sa mga government offices.
“As much as possible kung mag-celebrate og Christmas didto nalang ta sulod sa atong panimalay sa atoang family, dili nata magpromote og mass gatherings sama sa mga parties,” sumala ni Lopez.
Gibutyag ni Lopez, taas pa ang kaso ug ang local transmission sa dakbayan sa Davao.
Pasidaan ni Lopez dili gayod matapos ang pagtakod-takod sa sakit kung magpadayon gihapon nga magpasagad ang publiko.
Giawhag niini ang tanan nga mutuman sa mga mitigating measures nga gipatuman sa gobyerno kontra COVID-19.
RadyoMaN Aimee Guinita
