Davao City – Wala pa gi-embalsamar ug gihulat na lamang karon ang desisyon sa kabanay sa biktima nga usa ka special child kung ipailawom ba kini sa awtopsiya kinsa gi-tagod-tagod ug gilabay sa may Cabantian Road, Buhangin, Davao City, kagahapong adlawa.
Positibo nga giila kini nga si Margie Albarico, 31 anyos, giingong usa usab ka bungol ug amang sumala sa iyang amahan nga si Sopriano Albarico, 68 anyos, usa ka karpintero, residente sa Purok 4-B, Aranas Compound, Matina Pangi, Talomo ning dakbayan sa Davao.
Sumala pa nadunggan ni Sopriano sa radyo ang maong balita diin iyang gi-adto ang patayng lawas sa punerarya ug positibo nga gikumpirma nga iya kining anak.
Kahinumdoman nga nakaplagan sa usa ka sakop sa City Environment and Natural Resources (CENRO) ang gitagod-tagod nga lawas sulod sa itom nga garbage bag alas 5:46 sa buntag kagahapong adlawa diin gireport ug gi-endorso gilayon sa Buhangin PNP.
Samtang nagapadayon ang imbestigasyon sa kapulisan alang sa pagsuta sa motibo ingon man sa identidad sa suspetsado.
Subay niini, nanawagan og hustisya ang pamilyang Albarico sa gidangatan sa ilang kabanay kinsa brutal nga gipatay.
Sa gihimong pakighinabi sa DXDC RMN Davao news team ngadto sa amahan nga si Sopriano Albarico nga dili siya katuo sa gidangatan sa iyang anak human niya makit-i ang lawas niini nga gidala sa Angel Funeral Home ning dakbayan.
Gikanayon sa amahan nga dili na nila ipailawom sa awtopsiya ang patayng lawas sa iyang anak ug iya nalang ipalubong karong Agosto 3, adlawng Biyernes.
Hinaot ni Albarico nga makonsensya ug mo-surrender na sa kapolisan ang naghimo sa maong ngilngig nga binuhatan ug nagpaabot og dugang panawagan ngadto kang Davao City Mayor Inday Sara Duterte-Carpio nga matagaan og hustisya ang kamatayon sa iyang anak.
RadyoMaN Jason Amisola / RadyoMaN Renz Barbarona / RadyoMaN Don Pulayao
