Gihatod na sa iyang kataposang kapahulayan ang 16-anyos nga dalagita karong adlawa nga linuog nga gipatay niadtong Marso 10 ug napalgan na nga way nawong sa bakanteng luna sa Sitio Bankal, Brgy.Pajac, dakbayan sa Lapu-lapu .
Usa ka misa requiem ang gipahigayon alang kang Christine Lee Silawan sa Sto.Niño Mactan Parish sa Brgy.Mactan sa naasoy’ng syudad nga gisugdan ganihang alas 12:15 sa udto .
Human sa maong santos nga misa, gilubong si Silawan sa Cattleya Cemetery sa Lungsod sa Cordova .
Gawas sa pamilya sa dalagita, pipila sa mga classmate ni Silawan, apil na ang mga ni-simpatiya sa dalagita ug nanawagan og hustisya gumikan sa brutal niyang kamatayon ang mitambong sa misa requiem ug mihatod sa lubong sa dalagita .
Sagad sa mga mihatod sa lubong ni Silawan nagsuot og puti nga t-shirt nga dunay hulagway sa dalagita ug dunay pamung nga “Justice For Christine Lee Silawan, We will miss you so much” .
Lakip sab sa nitambong sa misa requiem mao ang mayor sa Lapu-Lapu City nga si Mayor Paz Radaza nga unang nang nitanyag og usa ka milyon ka pesos nga ganti alang sa pagdakop sa mga suspek sa pagpatay ni Silawan .
Kahinumduman nga usa sa mga gituohang suspek sa linuog nga pagpatay kang Silawan ang nadakpan sa mga sakop sa NBI-7 nga giingong kanhi uyab siya sa dalagita ug gikonsidera nga primary suspect .
Samtang padayon pang gisusi sa mga otoridad ang nahimutang sa giingong laing duha pa ka mga suspek sa maong krimen .
