TACLOBAN CITY – Ha gindumara nga post-earthquake structural usability evaluation han City Engineer’s Office, diri talwas ha publiko an building han usa nga pribado nga eskwelahan.
Ini in matapos an 6.5 magnitude nga linog dida han martes, April 23.
Nagkamayada hin dagko nga bitak an pira nga parte han eskwelahan upod na an column ha atubangan hini.
Samtang, waray karawta han presidente han ADFC nga hi Edward Chua an igingawas nga cease and desist order.
Sumala han school official, basi han assessment han pira nga mga eskperto in talwas an ira school building.
Siring ni Chua, pulitika an rason han pagpapagawas han cease and desist order tungod nga diri na kaalyado han iya bugto nga hi Councilor Edwin Chua an mga Romualdez.
Samtang, sumala naman kan Mayor Cristina Romualdez ha usa nga press conference, sisiguraduhon an katalwasan han mga Taclobanon tungod nga may ginkakabarak-an pa nga mga aftershocks.
