Aurora, Zamboanga del Sur – Nag-atubang pa sa blangko nga bung-bong ang kapulisan sa lungsod sa Aurora labot sa nahitabong pagpamusil alas 12:10 kaganihang kadlawon didto sa Brgy. Campo 1, Aurora, Zamboanga del Sur.
Napalgan nga nagdulog sa motorsiklo ang duha ka lalaking biktima nga naglunang sa dugo sa National Highway sa Purok Sta. Maria, Brgy. Campo 1 Aurora, Zamboanga del Sur.
Giila ang usa ka biktima nga si Castor Cabusas, 38 anyos nga nahigda tupad sa iyang motorsiklo nga walay plaka numero diin dihang nakit-an nga may samad pinusilan dali kining gidala sa Mharsgen Hospital, Ozamis City alang sa medikasyon.
Samtang wala na masalbar ang laing biktima nga si Ranulfo Rato dihang wala nay kinabuhi nga napalgan nga nagbaton sa pinusilan nga nagtapad sa motorsiklo nga may plaka numero JP 9099.
Nahipos sa dapit nahitabuan ang tulo ka basiyo sa bala sa caliber 45 nga naa na karon sa Zamboanga del Sur Provincial Laboratory alang sa Ballistic nga eksamenasyon.
Naglusad na og follow-up operation ang tropa sa Aurora Municipal Police Station alang sa pag-ila og pagsikop sa mga suspetsado.
