CIDG-XI: Duterte order vs KAPA ipatuman

Davao City – Andam sundon sa Criminal Investigation and Detection Group (CIDG-XI) ang direktiba ni Pres. Rodrigo Duterte nga sirad-an na ang mga buhatan sa Kabus Padatoon (KAPA) Community Ministry International ni Joel Apolinario.

Kahinumduman nga mismo si Duterte ang nagmando sa CIDG ug NBI nga sirad-an ug pa-hunungon na ang iskema sa KAPA isip tubag sa pangutana ni Apollo Quiboloy sa iyang programa sa television kung diin nahimong guest ang presidente Biyerne sa gabii sa miaging semana.

Hinoon, giklaro ni CIDG-XI head Maj. Milgrace Driz nga wala pa sila’y tino nga petsa ug adlaw kung kanus-a sugdan ang operasyon aron sirad-an ug pahunungon ang operasyon sa KAPA


Gikumpirma ni Driz nga aduna na sad sila’y gi-imbistigahan nga mga investment schemes bisan og wala pa nagpagula og kamandoan ang pangulo diin ang uban niini nanirado ug wala na nag-operate pa hilabi na kadtong misulod sa siyudad sama sa Jogle Innovative Marketing ug Rigen Marketing kansang mga buhatan nahimutang sa Maa ning dakbayan.

Dugang ni Driz nga mamahimong makasuhan ang mga nagpaluyo ug nagpadagan sa mga questionable investment schemes ug ang mahukmang guilty sa korte pagamultahan og lima ka milyon ka pesos ug 21 ka tuig nga pagka-preso.

Giklaro sa opisyal nga dili usab sila basta-basta makapasang-at og kasong syndicated estafa batok sa nagpaluyo ug nagpadagan sa iskema kung walay complainant kinsa mureklamo batok sa nahisgotang mga money-making schemes.

RadyoMaN Joel Viray

Facebook Comments