Davao City – Midangop sa Buhangin Police Station ang usa ka dentista aron ireklamo ang pipila ka opisyal sa lokal nga kagamhanan gumikan sa demolisyon sa Km. 5 Cor. UIC JP Laurel, Bajada, Davao City nga ilang gimando.
Ang gireklamo mao sila Atty. Janis Luis Esparcia, ug Atty. Joseph Dominic Felizarta kinsa labaw sa City Engineer’s Office.
Matud sa nagreklamo nga si Agnes Placencia, 52 anyos, minyo, dentista, ug nagpuyo sa naasoy nga dapit nga nagmando matud pa og demolisyon ang maong mga opisyales sa iyang luna niadtong Nobyembre 12, 13, 14, 15, ug 18.
Apan ang problema kay adunay giingong mga nadamyos nga mukantidad og P1.4-M ug mao kini ang nagpaaghat sa dentista nga moduso og reklamo batok sa mga opisyal.
Hinoon, wala na gibutyag ni Placencia kung may plano bang moduso sa kasong administratibo tungod sa iregularidad sa pagpatuman sa demolisyon.
Lakip nga gireklamo ang mga sakop sa Demolition Unit nga sila Perlito Sabiano, Dante Cadilla, Conrado Baja, Emelito Bolcan, ug Ricky Singson.
RadyoMaN Joel Viray
