Desfues del cuantos diaz aguasero que ya causa alto estado de avenida aqi na sentro del fueblo, el oficina del inhinyero del ciudad ya conduci ayer con el limpieza del mga canal y desague estangcao.
Prioridad ya limpia el CEO con el mga canal aqui na Pilar Street que lleno del mga lodo, poso negro y mga basura que ya causa para man stock up este y hinde mas ta fuede pasa buenamente el agua’y ulan.
Asegun con el Alcalde Beng Climaco-Salazar, desfues fuede mira personalmente del otro dia el efecto del avenida na ciudad que ya causa avenida na halos todol mga camino na entero fueblo, ele ya ordena con el CEO para actua insiguidas con el limpiesa del mga desague para menora el problema.
El OIC del Engineer’s Office Engr. Chris Navarro ya abla cay sila ya dale prioridad con el dislodging del mga canal donde el su mga personajes ya fuede recuvri mga estangcao plastics, rueda monton del mga basura y otro pa mga susyo que ya caba buta na mga desague el mga iresponsable vivientes na lugar.
Este dia hay continua syempre el mensyonao ofisina con el limpiesa del mga canal na Pilar Street, Veterans Avenue, Nuñez St, Gov. Lim y Climaco Avenue.
Si ta acorda, ya alcansa hasta na tuhod el avenida na mga camino mensyonao durante el dos diaz siguiditos aguasero que ya experiencia el ciudad recientamente. – *Bhong Simbajon/RMN News*
