Liwat nga magapain sang P4 million ang lokal nga panggobyerno sang Koronadal City para ipadayon ang Modified PALLGU Program subong nga tuig.
Subong nga tuig ilakip na ang mga mangunguma nga wala nabaton ang ila nga ani nga palay sang NFA tungod wala nalab-ot ang classification standard nga gintalana sang ahensya.
Sa nasambit nga programa magadugang sang P2:00 kada kilo sang palay sa buying price sang NFA ang lokal nga panggobyerno sang Koronadal nga ipaagi sa NFA South Cotabato Branch Office .
May-angot sini, nagpatigayon sang pagsinapol ang committee on agriculture sa pamumuno ni Councilor Henry Aguirre , upod ang mga representante sang NFA sa pagpamuno ni Branch Manager Hazel G. Solis, ABM Loi Mangayayam, BSQAO Marietes Distor, NIA Senior IDO Jenalyn Jetigan kag City Consultant Rey Legaste , CAO Emelita Miguel kag iban pa nga myembro sang Committee agud nga iplastar ang bag-o nga kasugtanan.
Nagapanguna nga katuyuan sang nasambit nga programa nga hatagan sang pagtamod ang sector sang mga mangunguma sa Koronadal City.
Madumduman nga sang nagligad nga tuig may-yara man sang kasugtanan ang LGU- Koronadal, NFA kag NIA agud nga buligan ang mga mangunguma sa pagnubo sang buying price sang palay.
