ILOILO CITY – Pursigido ang City PESO Nga mabuligan ang mga nag-gradwar nga drug surrenderers sa drug rehabilitation program sang siyudad.
Bangud sini, sa graduation kahapon sang 199 ka mga drug surrenderers, nagpakigbahin man ang City PESO kaupod ang pila ka mga kumpaniya agud maka-apply ang mga ini sang trabaho.
Suno kay PESO Head Cookie Benetiz, anum ka mga kumpaniya ang nagpakigbahin kon sa diin naghiwat ini sang interview sa mga drug surrenderers nga luyag magsulod sa trabaho.
Suno kay Benetiz nga sa 199 ka mga nag-graduate sa rehabilitation program, 45 sa mga ini ang nag-apply sang trabaho.
Ginalauman nga makasulod ang mga ini sa ila gin-aplayan nga trabaho kon sa diin liwat ang mga ini nga interbyuhon agud mahibaluan kon ini sila ang mabaton.
Samtang ginpahayag ni Benetiz nga magasugod na subong nga adlaw tubtub Agosto 23 ang ila pre-registration para sa Charter Day Job Fair nga hiwaton sa Agosto 24 sa Robinsons Place Jaro.
Sa nasambit nga job fair, 50 ka mga kumpaniya ang magapasakop sa pag-akomodar sa mga maga-apply sang trabaho.
