Davao City – Gipanawagan karon sa Davao City Disaster Risk Reduction Management Council (CDRRMC) ang pagseryoso sa himuong 3rd City-wide Full Scale Earthquake and Tsunami Exercise karong July 26, 2019, adlawng Biyernes.
Sa interbyu sa DXDC RMN Davao kang Rodrigo Bustillo, head sa Davao City Disaster Risk Reduction Management Council (CDRRMC) gibutyag niini nga pagasugdan ang aktibidad alas-9 sa buntag pinaagi sa Earthquake drill ug pag perform sa pag duck, cover and hold.
“Pagka alas-9 atong himuon, mo-duck, cover and hold ta niana. For 30 seconds ang tanan mo-perform sa duck, cover and hold, tanang mga tawo sa Davao ato gyung gi-awhag,” saysay ni Bustillo.
Dugang ni Bustillo nga sundan kini sa tsunami exercise pinaagi pagpatingog sa siren nga nagpasabot nga angay nang mamakwit ang mga nanimuyo duol sa mga baybayon.
“Among trigger ang remote siren sa Davao City uban ang mga barangay siren, mga simbahan, mga private kuan, patingogon na siya, pag signal nga ang tanang tawo nga duol sa coastal areas mupahawa kay dunay tsunami nga muabot,” tataw ni Bustillo.
Dugang sa CDRRMC head nga importante nga magbaton og igong kahibalo ang katawhan aron masayud kung unsay angay himuon ug magpabiling kalmado panahon sa dili matagna nga katalagman.
RadyoMaN Kirby Manzon
