*CIUDAD TA COMEMORA EL ACA-CUATRO AÑO GYERA ESTE DIA*
*BHONG SIMBAJON*
*El Ciudad de Zamboanga ta acorda este dia Setyembre nueve – con el aca cuatro* año comemoraccion del infamozo guerra na Zamboanga desdel añ0 2013.
Este dia el mga bandera del cuantos mga oficina del govierno ya pone bajo na half mast como respeto con el mga vivientes quien ya queda victima del guerra cuatro años ya el ya pasa.
Si ta acorda, el mas de kinientos mga rebelde Moro National Liberation Front (MNLF) el ya ataca con el ciudad del Setyermbre nueve, donde ya provoca sila man guerra con el military y policia desfues significa el diila intenccion para hace subi con el diila bandera na city hall.
Asegun con el alcalde Beng Climaco-Salazar, no cumbiene olvida el mga vivientes con el cosa ya socede, mientras hinde ta fuede dale justicia con el mga victima y casualidad del tal soceso.
Si Climaco-Salazar ya abla cay hasta aura, el govierno local ta encaveza con el serye de court proceedings para fuede servi el sentencia con el mas de dos sientos mga prisonero que responsible na atake aqui na ciudad.
El vice-alcalde Ceasar Itturalde ya abla tambien cay cumbiene esta firmi vigilante el fueblo, amediante del mga fuerte amenaso de estos mga mal-elementos.
El congresista Celso Lobregat ya abla tambien cay el ciudad de Zamboanga manada pa cosa cumbiene hace para fuede recuvri desdel cosa ya socede de antes. Cuatro año ya el ya pasa, sin embargo, nuay pa gayot fuede levanta el ciudad especialmente el mga lugar afectao, donde masquin chene ya sila mga casa, nuay pa esos agua, luz y buen escusao.
El govierno local hay encaveza luego tarde el un simple programa na memorial marker del Zamboanga Siege na vicinidad del Rizal Street, donde desfues hay chene el ofrecimiento del mga florez en honor con el mga victima del Guerra, lo mismo hay sigui tambien el un con “Concert of Valor” na vicinidad del city hall.- *Bhong Simbajon/RMN News*
