Gipahibalo karon ni PRO-10 spokesperson Supt. Surki Serena nga dool na nilang ipang apud-apud ang mga ginatawag nga “Clean Rider Stickers” alang sa tanang mga sumasakay ug motorsiklo isip lakang sa pagsugpo sa mga krimen sa syudad. Kahinumduman nga ang kampanyang “Clean Rider” kabahin sa programa ni PNP Director General Oscar Albayalde nga adunay tumong sa pagsuypo sa mga dautang elemento nga nagagamit ug motorsiklo alang sa ilang mga dautang binuhatan.
Matud pa nga nagsugod na sila sa pagrehistro sa mga interesado nga mga motor riders ug mga mahilig niini gikan sa mga regional, provincial, municipal ug labi na gyud sa syudad nga mga police stations. Gihulatan na lamang nila ang paggawas sa dili madugay sa maong mga stickers.
Dugang pa sa kapolisan nga libre ang maong sticker ug tuyo niini ang pagtino tali sa mga tarong nga motor riders ngadto sa mga criminal sa palibot. Tanang impormasyon nga makuha sa PNP sa mga nagparehistro na sa ilang opisina ang ipadala gilayon sa PNP’s Vehicle Information System sa PNP Highway Patrol Group aron masiguro nga maverify ug maclear kini.
Imbitado usab ang mga dagkung organisasyon nga naggamit sa motorsiklo alang sa ilang mga kalihokan sama sa Karancho ug Angkas.
