Ya deriji el alcalde Beng Climaco-Salazar con el mga ahensya local de CDRRMO, GSO y CSWDO para supervisa buenamente el situaccion del mga ta esta evacuantes del quema na Kasanyangan que ta esta na na DONGEMS Elementary School na Sta. Catalina.
Este desfues ya recivi reclamo el alcalde desdel mga mayores y administraccion del DONGEMS aserca el ta asquia mal-olor areredor del covered court donde ta esta esos mga evacuantes por dos semana ya.
Na entrevista del RMN Zamboanga, el alcalde Climaco-Salazar ya habla cay necesita el tres mencionao ofisina mejora el deployment del diila mga personajes, lo mismo el monitoring del situaccion na lugar y el limpieza areredor del temporario evacuation center na DONGEMS para asegura cay hinde mas agrava el asunto de sanitaccion na lugar.
El alcalde ya habla cay el govierno local amo necesita man monitor coneste estado del mga evacuantes y asegura cay fuede sila esta embuenamente amediante el trahedya que ya socede canila.
Ta entende asegun el alcalde con el situaccion de esos na evacuation center poreso ya ordena le con el CSDWO para mejora ya el movimiento para fuede conesos reloca de fronto na designao temporary shelter.
Desdel siento-veinte familia afectao, cuarenta familial ang el ya fuede reloca na Sitio Buggoc Transitory site na Barangay Kasanyangan y el losdemas posible pone canila na Masepla Transitory Site na mga diaz que viene. – *Bhong Simbajon/RMN News*
