Davao City – Gihulagway karon sa Kalipunan ng Damayan ng mga Mahihirap (KADAMAY) Davao ang district clustering mode ning syudad nga walay kalainan sa martial law kon balaud-militar.
Matud ni Kadamay Davao City Focal Person Toto Bolcan, ang katawhan maoy mamahimong alaot sa daw martial law nga sistemang district clustering nga gipatuman sa tanang mga mga barangay sa dakbayan.
Segun ni Bolcan, ang mga kabus maoy makaluluoy tungod kay limitado ang ilang lihuk ug dili usab sila basta-bastang makaadto sa merkado sama pananglit sa Bankerohan Public Market kung ang ilang barangay wala mailawom pananglitan sa Cluster 1.
Giingon ni Bolcan nga daghan unya sa mga pobre ang mamatay sa gutom ning panahon sa krisis o dili ba kaha ang kabus musamot pa gyod kakabus nunot sa maong sistema.
Gibahin sa unom ka district clusters ang 182 ka barangay sa syudad diin matag political district naglangkob sa mga barangay ug sa mga nag-unang merkado publiko ug uban pang importanteng mga establisimiento sa dakbayan nga mamahimo nilang adtoon alang sa pagpalit sa basic necessities.
Nasabtan ni Bolcan nga walay dautang katuyuan ang lokal nga kagamhanan sa pag-implimentar sa district clustering kon dili ang pagsanta lamang sa virus nga mokuyanap pa sa ubang parte sa atong lokalidad.
Nanghinaot si Bolcan nga mahuman na sa dili madugay ang krisis ug nga laumang mahibalik ra unya sa normal ang ekonomiya ug panginabuhian ug ang malinawong panginabuhi sa katawhang Pilipino nga giguba sa nasangpit nga balatian.
RadyoMaN Joel Viray
