Davao City – Wala pay nadawat nga feedback ang konseho gikan sa kampo ni Codilla kung na-isyuhan na ba kini og Certificate of Affirmation (COA) aron makalingkod isip Indigenous Peoples Mandatory Representative (IPMR).
Sumala ni 18th City Council Majority Floor Leader Councilor Melchor Quitain Jr. , imposibleng makapasa og resolusyon ang konseho alang sa paglingkod ni Cherry Ann Codilla gumikan gikinahanglan usa og issuance sa COA gikan sa National Commission on Indigenous Peoples (NCIP) nga maoy responsable nga buhatan bahin niini.
Gani ang ginahimo lamang sa konseho mao ang pagduso sa NCIP nga mag-isyu na kini og COA alang usab maserbisyuhan na ang IPs sa dakbayan diin duha na ka bulan kining bakante.
Kahinumdoman nga sa milabay’ng semana nagpasa og resolusyon ang konseho kabahin sa pagresolba ang isyu nga gikalambigitan sa NCIP ug ni Codilla apan giklaro ni Quitain nga ang maong resolusyon usa lamang ka suporta alang kang Codilla.
Subay sa barug sa NCIP nga desidido kining magpahigayon og bag-ong selection process, naglaum sa gihapon ang konsehal nga maresolba usa kining isyu gumikan mas modugay kung ipaabot kini nila sa korte sa konsiderasyon nga pinili si Codilla nga mamahimong representante sa Bagobo-Klata tribe.
RadyoMaN Jason Amisola
