Nagalab-ot sa masobra P3.5 million ang ginturn-over nga livelihood assistance checks sang Department of Labor and Employment ukon DOLE 12 sa Local Government Units (LGUs) sang Lebak kag Kalamansig sa Sultan Kudarat.
Nakabaton sang P1,947,152.00 ang LGU-Kalamansig kag P1,562,241.00 ang LGU-Lebak sa idalom sang DOLE Integrated Livelihood Program (DILP).
Makabenepisyo naman ang 280 ka mga indibidwal sa nasambit nga mga banwa nga kadam-an self-employed nga kulang ang kita, marginalized land farmers, seasonal workers, Persons with Disabilities, ginikanan sang mga child laborers, rebel returnees, kag mga kababainhan.
Samtang ang mga livelihood projects nga ginpili sang mga benepisyaryo ang food vending, mini carenderia, halo-halo refreshment, vegetable kag banana chips production, carwash services, beauty care, dressmaking, beads making, vulcanizing, welding services kag iban pa.
Ginpahayag ni DOLE 12 Regional Director Raymundo Agravante nga ang DOLE livelihood assistance ang makabulig sa komunidad nga nalakip sa RTF-ELCAC priority barangays partikular na ang Kalamansig.
Paklaro pa ni RD Agravante nga ang mga rebel returnees ang makabenepisyo man sang nasambit nga flagship program sang ahensya.
