Collector sang lending ginhold-up, mga suspek naka-bonnet

Dumarao, Capiz- Nagalab-ot sa P82,000 nga cash ang nakuha sa isa ka lending collector matapos ginhold-up samtang ginasubay ang dalan sa Brgy. Sagrada Familia, Dumarao, Capiz alas 3:30 kahapon sang hapon.
Suno sa panaysayon sang biktima nga ginkilala kay ARGIE DORUELO Y MORENO, 28-anyos sang BRGY. PATLAD, DUMANGAS ILOILO, nagasakay ini sa motorsiklo nga ginamaneho ni RIO BUHAYAN ADELITO nagikan sa Brgy. Sagrada Familia sang hinali ginbanggaan sang tatlo ka mga naka-bonnet nga suspek.
Nakatigayon nga maka-palagyo ang driver sang motorsiklo padulong sa kampo sang tubo apang nabilin naman ang biktima. Gilayon nga nagdeklarar sang hold-up ang isa sa mga suspek nga suno sa iya paglaragway nagataas sang 5’5″, naka-bonnet kag lunsay itom nga panapton ang ginasuksok.
Ginpahayag dugang sang biktima nga gintayaan siya sang wala makilala nga sahi sang armas luthang. Kalakip sa mga nakuha sang mga suspek ang back pack sang biktima nga may unod nga collection nga naglab-ot sa P82,000, drivers license, ATM card, IDs kag iban pa nga kagamitan sang biktima.
Madasig nga nalagyo ang mga suspek sa direksyon padulong sa San Rafael, Iloilo. Samtang, padayon pa nga gina-imbestigahan sang mga kapulisan ang panibag-o nga insidente sang pagpanghold-up sa banwa sang Dumarao.

Facebook Comments