TACLOBAN CITY – Patay an usa nga 20 anyos nga lalaki matapos nga gin-aaligar umato ha mga kapulisan ha gindumara nga buy-bust operation ha Brgy. 50-B Youngfield, Tacloban City kasangkulop alas 8:36 han gab-i, February 8, 2019.
Ha report han Police Regional Office 8, ginkilala an umato nga suspek nga hi Von Fheinry Claridad Grandiza, usa nga college student, residente ha Brgy. 50, 176 Real St. Tacloban City.
Subay han report, ginbaligyaan han suspek an posuer buyer han PNP hin pakete han gin-aaligar shabu pero han aarestuhon na han mga otoridad hi Von, dumalagan ini ngan sumakob ha panimalay nga gintatag-iyahan ni Jose Francisco Soledad ngan didto nakakuha hin pusil an suspek ngan ginpabuthan an mga kapulisan.
Umato naman an mga otoridad ngan naigo hin bala han pusil hi Von ha magkadurudilain nga parte han iya lawas.
Nadara pa han mga arresting team an suspek ha hospital pero gin-anunsyo han doctor nga patay na hi Von.
Sumala han PRO8, High Value Target level 2 an suspek.
Arestado gihapon an iba pa nga suspek nga nakadto ha nasabi nga drug transaction, ginkilala ini nga hira Archie Montejo Claridad, 21 anyos, senior high school student, residente ha Brgy. 50, 176 Real Street, Tacloban City; ngan hi Harold Tupaz Bato alyas “Tayod”, 22 yrs old, residente ha Brgy. 50 – B, Youngfield Tacloban City, pareho gihapon nga High Value Target level 2 han PRO8.
Nakompiska ha ira possession an walo (8) kapakete han shabu.
Maatubang an mga suspek hin kaangayan nga mga kaso ha ilarom han Dangerous Drugs Act.
