98 % respondents pabor sa Pangulo sa RMN DXBC on air survey; Neri Colmenares dili mutuo
Nakakuha ug taas nga grado si Pang. Rodrigo Duterte gikan sa mga tigpaminaw sa RMN DXBC Butuan sa dihang naglusad kini ug on-air survey sa programang Kuskus Batikos ug Straight to the Point.
Natala nga adunay 60 ka mga live callers sa programa sa DXBC ug nihatag sa ilang grado sa administrasyon ni Pang. Duterte kung asa 10 puntos ang pinaka-taas ug 1 punto ang labing ubos.
Sa maong on-air survey nigawas nga 98% sa mga callers ang nihatag ug taas nga grado sa liderato ni Pang. Duterte.
Sa programang Straight to the Point Sunday edition adunay 35 ang nahimung callers kung asa 31 kanila ang nihatag ug 10 nga grado, 1 ang nihatag ug 7 samtang duha ang nihatag ug 5 nga grado.
Kasagarang gitumbok nga rason sa mga callers sa paghatag ug taas nga grado sa Presidenti mao ang pagkunhod sa illegal nga droga; sementadong dalan tungod sa Build, Build, Build; isug nga pagbangga sa mga oligarchs; ug uban pa.
Samtang gireklamo usab sa mga SSS pensioners ang pasalig ni Duterte nga usbawan ang monthly pension apan hangtod karon wala matuman.
Ang pila-pila lamang sa mga callers sa DXBC nga nihatag ug grado ni Pang. Rodrigo Duterte.
Dugtong sa maong balita… Dili motoo si kanhi Bayan Muna Representative Atty. Nery Colmenares nga tahu nga daghan pa’ng mga tigsuporta si Pang. Rodrigo Duterte karong panahona.
Kini ang reaksyon ni Atty. Colmenares sa interview sa RMN DXBC Butuan human gipadayag nga adunay 98% nga nakuhang suporta si Pang. Duterte sa gihimung on-air survey ning sibyaan.
Sigun ni Atty. Colmenares nga kaniadto sa pagsugod pa lang sa administrasyong Duterte nagtoo siya nga daghan ang nisuporta sa iyang liderato gumikan sa daghang mga saad nga kabag-ohan apan sa pagligid sa katuigan hinay-hinay sumala pa nga nawala ang suporta sa mga tawo tungod kay wala bisan usa matud pa ang natuman sa iyang mga saad.
Nakahatag ug dakung problema sa administrasyon ang gipakita niini nga walay kakayahan nga sulbaron ang krisis sa COVID 19 pandemic.
Gisaway ni Colmenares ang pagdapig ni Duterte sa China luyu sa klarong pag-ilug niini sa West Philippine Sea ug gipasagdan lamang sa goberno, ang walay katumanan sa saad nga undangon ang kontraktwalisasyon, pakyas nga pagsumpo sa droga ug korapsyon ug daghan pa’ng uban.
