El comandante del Western Mindanao Command Lt. General Carlito Galvez, Jr ya comenda con el mga tropa del Joint Task Force Sulu y Tawi-Tawi por el diila dedicaccion na servicio y na esfuerzo para neutraliza con el mga bandido Abu Sayyaf na mensyonao maga provincial.
Si General Galvez ya visita con el dos mga isla del pecha kinse de este mez donde ele ya conduci conferencia con el mga oficiales del dos mando military, lo mismo ya visita con el mga tropa quien ya iri na serye del mga engcuentro del mga soldao y mga bandido na dos separao provincial.
El comandante del Joint Task Force Sulu – Brigadier General Cirilito Sobejanaya reporta con Galvez cay hinde lang ta combate ta avancha el mga soldao na isla de Sulu, sin embargo, inclujido ya na conducta del civl-military y intelligence operations para man combate contra terorismo na lugar.
Este tiempo, trese mga bandido Abu Sayyay el recientamente ya muri na serye del engcuentro na montesco del Sulu, asegun con Sobejana.
Durante tambien el visita de General Galvez na Joint Task Force Tawi-Tawi na Sanga-Sanga, Bongao del Viernes pasao, ya comenda este con el mga tropa bajo con Brigadier General Custodio J. Parcon, Jr. quien ya fuede neutraliza con cuantos campo del bandido na lugar, lo mismo el recuvrida del mga explosiva y creaccion del Joint Task Force IndoMalPhi que ta man-address el cross-border kidnappings y pirata na lugar. – *Bhong Simbajon/RMN News*
