General Santos City–Karong adlawa subling ablihan sa Comelec Gensan ang ilang buhatan aron mudawat na usab sa mga certificate of candidacy sa mga gustong mupapili sa 2019 midterm elections.
Sumala ni Gensan Election Officer April Mitchor Miguel, lauman nga karong adlawa dugukon sa mga kandidato ang ilang buhatan aron nga mupasa sa ilang mga COC.
Kahibaluan nga gisugdan kaniadtong petsa 11 sa Oktobre ang filing ug matapos kini karong adlawng myerkules, Oktobre 17.
Kalabot niini nagpahimangno si Atty. April Miguel ngadto sa mga kandidato nga ipanigurong klaro ug hapsay ang ilang mga pirmahang COC. Giklaro sa opisyal nga sa matag posisyon nga daganan dunay partikular nga form sa coc ug dapat dili masipyat ang kandidato sa ilang ipasa. Dugang pahimangno ni Miguel nga mas maayong musayo ug dili na kinahanglan pang magpaabot sa ulahing adlaw sa filing. (Jordan Britos)
