Dapitan City-Bisan si Congressman Seth Frederick “Bullet” Jalosjos wala dayon makasabot nganong gitagaan siyang symbolic key ni Davao Mayor Sara Duterte-Carpio atol sa caravan niini sa Hugpong ng Pagbabago o HNP sa dakbayan sa Dipolog niadtong milabayng Martes.
Sa interview sa telepono gabii, ang batan-ong Jalosjos miingon nga nagkahinay ug tuyhakaw ang tubag sa iyang pangutana sa dinhang nakadawat siyag kopya sa desisyon sa First Division sa Commission on Elections nga nag-disqualify kang Evelyn Tang Uy sa pagdagan pagka-mayor sa Dapitan.
“The Certificate of Candidacy of respondent Evelyn Tang Uy for the position of mayor in Dapitan City, Zamboanga del Norte is hereby cancelled,” nagkanayon ang decision sa First Division nga gipermahan ni Al A. Parreno, ang presiding commissioner, ug sa mga member commissioners nga sila si Marlon S. Casquejo ug Ma. Rowena Amelia V. Guanzon.
Ang decision gi-promulgate niadtong Abril 3, usa ka adlaw human gipahigayon ang caravan-rally sa HNP ug sa Aggrupation of Parties for Progress kun APP sa Dipolog diin gihugupan kini ug dili mominus sa dose ka libo ka mga supporters.
Ang nahisgutang decision nagsumikad sa petisyon nga gipasaka ni Mayor Rosalina G. Jalosjos nga nagpabasura sa COC ni Uy tungod sa nagkalain-laing rason, apil na niini ang napamatud-an nga ang kanhi mayor sa Dipolog dili residente sa Dapitan.
Matud ni Bullet Jalosjos nga sa umalabot pang mga panahon, hingpit na niyang matugkad kun unsa gayud ang rason nga nagpaluyo sa paghatag ni Sara kaniya sa symbolic key.
Miingon ang batan-ong kongresista nga magpapili pagka-gobernador sa probinsiya nga sa iyang pakighinabi kang Sara, dako ang pasalamat sa anak sa presidente sa malampusong pagpahigayon sa caravan-rally sa HNP-APP sa Dipolog ug Sindangan.
Samtang sa laing bahin mihatag usab ug pagpasabot ang bando ni Belen Uy, Pinaagi ni Praxides Rubia nga matod niya dili pa angay magmaya ang pamilyang Jalosjos ug dili usab angay mabalaka ang mga supporters ni Belen Uy tungod kay taas pa kaayong proseso ug daghan pang mga pamaagi may kalabot sa maong pag deny sa COC ni Belen.
