TACLOBAN CITY – Ginpamumusil-patay an usa nga COMELEC officer ha Brgy. Pongon, MacArthur, Leyte kakulop, October 15.
Subay ha report han Police *Regional* Office 8, ginkilala an biktima nga hi Maureen Palejero Japson, 42 anyos, mayada live-in partner, election assistant officer han MacArthur, Leyte ngan residente han Brgy. San Rafael, Dulag, Leyte.
Nagawas ha inisyal nga imbistigasyon han mga otoridad, sakay hi Maureen han motorsiklo nga ginmamaneho han iya officemate nga hi Roldan Evangelista, tipakadto unta hira ha ira boarding house pero gin-alihan hira han duha katawo nga nagpaka helmet sakay gihap han motorsiklo.
Waray na magyakan an mga suspek, tigda nala bumunot hin pusil an usa nga suspek ngan ginpusil hi Maureen, han mapahigda hi maureen ha tuna ginbirahan pa ini pagpusil pa.
An upod ni Maureen nga hi Roldan, dumalagan naman pahirayo ha crime scene.
Kumalagiw naman an mga suspek matapos an krimen.
Ha interview han RMN kan P/Capt. Jennifer Medalla, Chief of Police han MacArthur, Leyte, mayada hira ginsusubay nga anggulo hini nga krimen kun diin hi Maureen miyembro hadi han nakikigbisog nga grupo.
Padayon naman an imbistigasyon han mga otoridad ha hini nga insidente.
