COMELEC, wala pay nadawat nga Certificate of Candidacy sa muhulip sa mitaliwang nagpapili pagka bise mayor nga si Dongkoy Emano

PC: RadyoMaN Joanna Mae Ricote

Wala pay nadawat ang Commission on Elections kon COMELEC nga Certificate of Candidacy alang sa posibleng muhulip sa mipanawng si kanhi Mayor Vicente Dongkoy Emano, kinsa nagpapili pagka bise mayor sa dakbayan.

 

Matud ni Atty. Ramil Acol, ang City Election Officer sa COMELEC nga wala pa miduol sa ilang buhatan ang Partido Padayon Pilipino aron magpadayag sa muhulip kang vice mayor candidate Vicente Emano, ilalom sa balaod nga substitution.

 

Dugang pa niini, nga ilang dawaton ang COC sa substitute ni Dongkoy Emano, hangtod sa adlaw sa eleksyon.


 

Mahinumduman nga kagahapong adlawa, namatay si Dongkoy Emano, samtang gidungog nga muhulip kaniya mao ang iyang anak nga si Nadya Emano-Elipe.

 

Nasayran nga ang legal nga departamento ang mudesisyon kung tugutan si Nadya nga mupuli sa iyang amahan, luyo nga na minyo na kini sa Elipe.

 

Apan matud ni Atty. Acol nga dunay balaod nga nagtugot sa kinsa mang minyo nga babaye nga gamiton ang iyang apelyido sa pagka dalaga.

 

Buot ipasabot, mamahimong gamiton ni Nadya ang iyang apelyido pagka dalaga nga mao ang Emano bisan og na minyo na kini sa Elipe.

Facebook Comments