TACLOBAN CITY – Nagpahinumdom an Commission on Election o kun Comelec nga ha June 13 na an deadline han pagfile han Statement of Contributions and Expendentures (SOCE) para han mga nangandidato ha bis ano nga posisyon dida han May 13.
Sumala kan Atty. Ma. Goretti Canas, tag-mangulo han Tacloban City Comelec, mapa-perdi o daog, kinahanglan magsalawad kun pira an mga nagastos han kada kandidato.
Ha mao nga syudad, pira nala ka adlaw ugsa an deadline in waray pa bisan usa nga kandidato ngan an nagdaog an nag file hin SOCE.
Ha ilarom han Comelec Resolution 10505, an opisina han mga elected candidate nga waray makagsalawad han SOCE in makokonsidera nga “Vacant” pursuant han Section 11 of the Omnibus Election Code (OEC), tubtub nga hiya in makag comply ngan magsumiter ha sakob han 6 ka bulan.
Perpetual disqualification naman ha mga masunod nga eleksyon an aatubangon han napirde nga kumandidto nga waray magsalawad han iya SOCE.
Para naman han mga waray makagsalawad, may penalidad nga nagkakantidad hin P10,000 para han mga senador, party-list organizations ngan national political parties; P8,000 para han provincial governors ngan vice governors; P7,000 para han Provincial Board members, congressmen, local political parties, mayors ngan vice mayors; ngan P6,000 para han mga konsehal.
Tulo nga hard copy han SOCE form nga naka-notaryo ngan soft-copy han form nga igbubutang ha flash drive an igpapasa han mga kandidato para han mga ma pa-file ha mga Comelec Field Offices.
