COMELEC-XI: Kapin 131K nakaparehistro alang sa Barangay ug SK elections

Davao City – Muabot sa 131,170 ang total sa mga nakaparehistro sa Davao Region sa gihimong voter registration gikan Disyembre 12, 2022 hangtud Enero 31, 2023.

Sa interbyu sa DXDC RMN Davao kang Atty. Gay Enumerables, tigpamaba sa Commission on Elections (COMELEC)-XI, gibutyag niini nga pinakadaghang registrants sa Davao City nga anaa sa 42,438. Sa maong ihap, 14,363 niini gikan sa 1st District; 2nd District (11,581); ug 3rd District (16,494).

Samtang sa entero sa rehiyon, sunod sa Davao sa pinakadaghang registered voters mao ang Davao del Norte nga anaa sa 26,895; Davao de Oro (18,803); Davao Oriental (16,604); Davao del Sur (16,064); ug Davao Occidental (10,366).

“Basically, taas-taas gyud ang mga new registration. Although taas pud ang transfer pero taas gyud pud ang new registration including the SK (Sangguniang Kabataan),” sulti sa COMELEC-XI official.

Gikatakdang himuon ang Barangay ug SK Elections sa October 30, 2023 o sa katapusang Lunes karong tuiga.

RadyoMaN Kirby Manzon