COMELEC-XI: Kapin 70K new voters nakarehistro na

Davao City – Nagpasalamat ang Davaoeño nga si Rovanne Mira sa ginapahigayon nga voter registration sa designated malls sa syudad sa Davao. Gani, giawhag usab niini ang iyang kaila nga si Joecelyn nga i-avail ang maong kahigayonan.

Sa interbyu sa DXDC RMN Davao kang Atty. Gay Enumerables, nagpadayon karon ang mall registration sa syudad ug sa mga lugar asa pwedeng mapaduol ang serbisyo sa katawhan.

“For the first district naa na karon sa SM Ecoland. Didto ang mall registration. For the third district, naa gihapon sa Magsaysay Park and sa second district, naa sa SM Lanang (ang) mall registration,” matud ni Enumerables.

Sa datos sa COMELEC-XI, gikan Disyembre 12, 2022 hangtud Enero 21, 2023, anaa na sa 72,883 ang bag-ong registered voters. Sa maong ihap, 24,315 niini gikan sa Davao City; Davao del Sur (7,333); Davao Occidental (6,504); Davao del Norte (14,772); Davao de Oro (11,015) ug Davao Oriental (8,944).

Padayon ang pag-awhag sa COMELEC-XI sa publiko nga magparehistro na labi na nga walay planong magbaton og extension sa voter registration deadline sa Enero 31, 2023.

RadyoMaN Kirby Manzon