Isa ka commotion an nahitabo kuman buntag sa atubangan nan PPA Main gate sa may dayan Borromeo Navarro inin syudad tali na sa mga nagwelga na sakop sa Surigao Dockworkers Association sanan sa pwersa nan mga gwardya sa PPA, ini human na tagharangan nan mga nagwelga an sakyanan nan THPAL na nagdaya sa ila mga kargamento para unta ipagawas gikan sa amu na pantalan.Sumaya pa na waya toguti sa mga sakop sa dockworkers an pagpagawas nan ini bisan paman kon may clearance o pagtugot sa kadumayahan nan PPA Surigao. Tagrason isab nan mga gwardya na may pagtugot na sa kadumayahan na pagawson an amu na sakyanan na nagkarga nan ila mga kargamento gani gipakita pa an clearance sa mga nagwelga .Resulta sa pagmagahi nan mga nagwelga, miabot an PNP Provincial Director na si Supt. Anthony Maghari para ipatuman unta an pagpaagi sa amu na sakyanan pero pakyas gihapon an kapolisan resulta na gibalik an mga kargamento suyod sa pantalan. Sa nakuha na impormasyon nan RMN Surigao, isa ka closed door meeting an taghimo tali sa nanguyo sa Dockworkers sanan sa kadumayahan nan PPA para masulbad an amu na isyu. Nahibaw an isab kuman bag-o na misugot na an nagwelga na pagawson an amu na kargamento na ija sa THPAL pero ini himuon silom pa na adlaw. Kon kahinumdoman , na moabot na sa 21 diyas an pagwelga nan inin mga sakop sa Dockworkers tungod sa tag ajo nila na umento sa ila suholan ngadto sa PCBSI o Prudential Customs Brokerage Services Inc. lakip an gusto nila na pagtake over sa PPA na hangtud kuman ya pa mahatagi nan pagtagad. Dako na isab an epekto nan inin ila pagwelga ngadto sa mga negosyante sa Surigao. (Jerson Fuentes)
