Valencia City, Bukidnon – Gipahayag sa Valencia City Police Station nga dakong tabang sa kampanya kontra illegal nga droga ang community base drug rehabilitation program sa siyudad.
Sa interview sa RMN ngadto kang PSupt. Al Abanalez, ang hepe sa Valencia City PNP gibutyag niini nga dako ug epekto ang mao nga programa tungod kay daghang mga drug personalities nga naglangkob sa user ug pusher ang nipailawom niini.
Hinoon aminado ang hepe nga aduna pa gihapon silay kasayuran nga nadawat nga adunay pipila nga nalambigit pa gihapon sa illegal nga droga.
Subay niini, gibutyag sa opisyal nga magpadayon ang mao nga programa nga ilang ipatuman ilabina sa mga kabarangayan.
Gisiguro usab ni Abanalez nga ilang dakpon ang mga tawo nalambigit sa paggamit ug pagpayuhot sa illegal drugs.
Samtang sa pikas bahin, sa Malaybalay City, muabot usab sa kinatibuk-ang 1,971 self-confessed drug users ang nakakompleto na sa non-confined community-based drug rehabilitation program (CBRP) nga nagsugod pa kini kaniadtong January 15, 2017 ug nahuman ang ika-siyam nga 9 batch sa nakalabay nga December 2, 2017 sa siyudad sa Malaybalay.
