Davao City – Gikumpirma karon sa Davao City Disaster Risk Reduction Management Office (DRRMO) ang subling pagpahigayon sa City Wide Community Emergency Response Team Training alang sa kabatan-onan human gibanhaw ang Sangguniang Kabataan.
Sumala ni DRRMO Admin Officer & Training Director Lyndon Ancajas, kaniadto tuig 2013 ulahing gipahigayon kini apan na-undang gumikan sa pagkawala usab sa SK.
Segun ni Ancajas, ang City-wide Community Emergency Response Team Training ginapahigayon sulod sa unom ka bulan.
Gani, sa bag-ong porma sa SK, mi-level-up usab ang skills training nga ipahigayon niini.
Kahinumdoman nga kaniadtong Hulyo 2, 2018 atol sa oath taking ceremony sa bag-ong SK officials nga gipahigayon sa Davao City Recreation Center, nanghinaot si Davao City Mayor Sara Duterte-Carpio nga i-apil sa mga programa sa SK ang disaster preparedness.
Giklaro ni Ancajas nga parte sa Year Development Fund sa SK ang Disaster Risk Reduction Management.
Samtang ipahigayon karong Hulyo 27 ang ikaduhang City Wide Shake Out Drill subay sa selebrasyon karong bulan isip National Disaster Resilience Month.
RadyoMaN Jason Amisola
