General Santos City–Padayon ang monitoring sa DOH Regional Office-12 sa tibuok rehiyon dungan na usab sa pagsugat sa bag-ong tuig unyang tungang gabie.
Dako ang panghinaot ni Jenny Ventura sa DOH-12 nga dili na madungagan pa ang ihap sa nasamdan gumikan sa pabuto nga ilang natala sa rehiyon.
Sa kasamtangan nagpabiling usa ang nabiktima sa pabuto sa Rehiyon 12 diin biktima niini ang 10 anyos nga bata nga taga Malungon, Sarangani Province.
Padayon usab ang kampanya sa DOH sa pagpatuman ug community fireworks display.
Mamahimo matud pa kining ipatuman sa matag purok o barangay pinaagi sa pag identify ug usa ka lugar hain tua magpahigayon ug fireworks display uban ang kumunidad.
Inay magpabuto, mas maayong mogamit nalang ug torotot o dili ba kaha busina sa unsa mang matang sa sakyanan sa pagsaba-saba dungan sa pag sugat ug bag-ong tuig.
