Davao City – Ang Davao City Health Office ni-aksyon na karon ug kabalaka sa kalit nga pagsutoy sa ihap sa mga Dabawenyo nga nag-positibo sa HIV-AIDS karong mga panahona.
Matud ni CHO chief Dr. Josephine Villafuerte, usa sa ilang nakita nga posibleng solusyon sa HIV-AIDS incidents mao ang pag-montar og mga condom dispensing machines diha sa vicinidad sa mga lodging house, inns, motels ug mga restaurants denhe sa dakbayan.
Apan gipaklaro ni Villafuerte nga plano pa lamang kini ug wala pa’y pinal nga desisyon kay kasamtangang ginatuki pa kini og maayo sa ilang buhatan ug sa grupo nga nagsugyot niini nga istratehiya kontra HIV-AIDS.
Gipasabot ni Villafuerte nga ang tumong sa pagbutang og condom dispensing machines sa lodging houses, inns ug restaurants mao ang pagseguro nga malikay sa HIV-AIDS ang mag-partner nga maghilawas.
Gipakusgan usab sa City Health Office ang education campaign sa kabarangayan aron mas masabtan pa ang importansya sa paggamit og condom batok sa HIV-AIDS, dugang ni Villafuerte.
Base sa records sa tuig 2018, ang National HIV-AIDS Registry nakatala na og 56,181 ka tawo nga infected sa makamatay nga balatian diin usa ang siyudad sa Dabaw nga nagbaton sa pinakataas nga record human miabot og 2,525 ka mga insidente.
Nahibaloan nga sagad sa nataptan pulos lalake nga nag-edad og 30 pataas tungod sa pagsalo nila sa lawasnong panginahanglan ug ang pinakabata nagpangidaron pa og 12 anyos.
RadyoMaN Joel Viray
