CONG. FREDENIL CASTRO: Capiz State University – Sapian Satellite Campus, liwat nga magabukas

67

CAPIZ- Ginkumpirmar ni Capiz 2nd district Congressman Fredenil Castro ang liwat nga pagbukas ang Capiz State University – Sapian Satellite Campus sa banwa sang Sapian, Capiz.
Suno kay Castro nga ila nahinalaan ang nasambit nga plano kaupod ang pamunuan sang Capiz State University (CAPSU) kag Commission on Higher Education (CHED) bangud nagapati ini nga madamo sang mabuligan nga mga ginikanan nga luyag nga mapatapos sa pag-eskwela ang ila mga kabataan sa tion nga mabuksan na ang amo nga eskwelahan.
Ginpahayag dugang ni Castro nga bangud sang iya pagpanikasog nakapangita ini sang pondo nga naglab-ot sa 40 milyones pesos nga gamiton para sa pagpatindog sang academic kag administration building nga yara na gintugyan sa pamunuan sang CAPSU.
Ang amo nga pondo ang igatugyan naman sa Department of Public Works and Highways (DPWH) pinaagi sa isa ka Memorandum of Agreement (MOA) bilang implementing agency sa pagpatukod sang nasambit nga proyekto kag pagahulaton nalang ang bidding agud maumpisahan na ini.
Nagalaum naman si Castro nga matapos sa madali nga panahon ang proyekto bangud madamo ang mabuligan sini indi lamang sa banwa sang Sapian kundi mangin sa kaiping sini nga mga kabanwahanan sa probinsya.
Nahibaluan nga si Cong. Fredenil Castro, isa sa mga miyembro sang Board of Regents sang CAPSU.

Facebook Comments

From Advertisers