SURIGAO DEL SUR CONG. PROSPERO PICHAY, GI-ABSWELTO SA SANDIGANBAYAN SA KASONG GRAFT
Gibakwi sa Sandiganbayan 5th Division ang guilty verdict batok kang Deputy Speaker ug Surigao del Sur Rep. Prospero “Butch” Pichay Jr., nga nag-atubang sa kasong graft labot na sa anomaliyang ₱1.5 million chess tournament.
Sa 24 ka pahinang desisyon, gibaliktad sa anti-graft court ang naunang desisyon niadtong Oktubre 23, 2020 diin gisentensyahan si Pichay og laing duha pa nga nakasupak Republic Act 3019 o ang Anti-Graft and Corrupt Practices Act ug Republic Act 6713 o ang Code of Conduct and Ethical Standard.
Gumikan sa bag-ong desisyon nga gipagawas karon sa Sandiganbayan, napawalay sala si Pichay sa maong nahisgutan na kaso.
Sa desisyon ni Associate Justice Maryann Corpus-Mañalac, giangkon sa korte nga nasayop sila sa unang gipagawas nga desisyon human napamatud-an na walay igong ebidensya batok sa mga akusado nga sila si Pichay ug kaubanan niini nga sila si Emmanuel Malicdem ug Wilfredo Feleo.
Gimando sab sa anti-graft court nga bakwion ang Hold Departure Order o HDO batok kang Pichay, og ibalik ang gipyansa niini.
Nag-ugat ang kaso niadtong 2010 dihang Chairman pa sa Local Water Utilities Administration ug Presidente sab kaniadto sa National Chess Federation of the Philippines si Pichay kung diin nag-sponsor ang ahensya og ₱1.5 million sa usa ka chess tournament.
